ગુજરાત સૌરાષ્ટ્ર – કચ્છ

રાજકોટના 65 વર્ષીય વૃદ્ધમાં મળ્યું દુર્લભ બ્લડ ગ્રુપ, ‘EMM નેગેટિવ’વાળા દુનિયામાં માત્ર 10 લોકો

EMM Negative Blood Type: રાજકોટના 65 વર્ષીય શખ્સના લોહીનો દુર્લભ પ્રકાર મળી આવ્યો. દેશમાં પહેલો અને દુનિયામાં 11મો કિસ્સો છે. હાર્ટ સર્જરી કરાવવાની હતી એ વખતે કોઈની સાથે લોહી મેચ ના થતાં સેમ્પલ અમદાવાદ અને સુરત બાદ અમેરિકામાં મોકલવામાં આવ્યા હતા. જ્યાં ખબર પડી કે, આ શખ્સના લોહીમાં EMMની ઉણપ છે.

અમદાવાદ: રાજકોટના 65 વર્ષીય વ્યક્તિને 2020માં કાર્ડિયાક સર્જરી કરાવવાની હતી ત્યારે તેમનું મેચિંગ બ્લડ ગ્રુપ ના મળતાં ખૂબ આશ્ચર્ય થયું હતું. તેમને અત્યાર સુધી એવું હતું કે તેમનું બ્લડગ્રુપ AB પોઝિટિવ છે જે સર્વગ્રાહી છે પરંતુ એવું નહોતું. અમદાવાદ અને સુરતની લેબમાં તેમના સેમ્પલ મોકલ્યા પરંતુ લોહીનો પ્રકાર ઓળખવો મુશ્કેલ જણાતાં લોહીના સેમ્પલને વધુ તપાસ માટે અમેરિકા મોકલાયા હતા. આટલી લાંબી પ્રક્રિયામાંથી પસાર થયા બાદ આખરે જાણવા મળ્યું કે, તેમનું બ્લડ ગ્રુપ EMM નેગેટિવ છે. વિશ્વભરમાં આ બ્લડગ્રુપ ધરાવતા માત્ર 10 લોકો છે અને રાજકોટના આ વ્યક્તિ 11મા છે.

પ્રતીકાત્મક તસ્વીર

રાજકોટમાં મેચિંગ બ્લડ ના મળતાં અમદાવાદ લવાયા

‘એન્ટી EMM, અ રેર સ્પેસિફિસિટી ટુ ધ હાઈ ઈન્સિડેન્સ એન્ટીજન EMM ઈન એન ઈન્ડિયન પેશન્ટ ડિફાઈનિંગ ધ ન્યૂ બ્લડ ગ્રુપ સિસ્ટમ EMM (ISBT042)’ નામનું રિસર્ચ પેપર એશિયન જર્નલ ઓફ ટ્રાન્સફ્યુશન સાયન્સમાં પ્રકાશિત કરવામાં આવ્યું છે. રિપલ શાહ, સ્નેહલ સંજલિયા અને સન્મુખ જોષી સહિતના રિસર્ચરોએ મળીને આ પેપર સબમિટ કર્યું છે. અમદાવાદમાં આવેલી પ્રથમા બ્લડ બેંકના ડાયરેક્ટર ડૉ. રિપલ શાહે કહ્યું, જ્યારે રાજકોટની બ્લડ બેંકમાં મેચિંગ બ્લડ ગ્રુપ ના મળ્યું ત્યારે દર્દીને અમદાવાદ લાવવામાં આવ્યા પરંતુ અહીં પણ તેવું જ થયું.

હાર્ટ અટેક બાદ સર્જરી વખતે હતી લોહીની જરૂર

“હાર્ટ અટેક બાદ બાયપાસ સર્જરી માટે લોહીની જરૂર હતી. તેમના લોહીમાં રહેલું એન્ટીબોડી સલાઈન અને એન્ટી ગ્લોબ્યુલીન ફેઝમાં રિએક્ટ કરતું હતું. તેમના બાળકોનું લોહી પણ તેમની સાથે મેચ નહોતું થતું”, તેમ ડૉ. શાહે ઉમેર્યું.

પ્રતીકાત્મક તસ્વીર

EMMની ઉણપ હોવાનું સામે આવ્યું

બાદમાં આ શખ્સના બ્લડ સેમ્પલ વધુ એનાલિસિસ માટે સુરત મોકલવામાં આવ્યા હતા અને બાદમાં તપાસ માટે યુએસ મોકલાયા હતા. પરિણામમાં સામે આવ્યું કે, તેમના લોહીમાં EMMની ઉણપ છે. “ઈએમએમ લગભગ બધા જ લોકોના લાલ રક્તકણોમાં હોય છે. પરંતુ તેની ગેરહાજરીના કારણે તેમનું લોહી એકપણ સેમ્પલ સાથે મેચ ના થયું. દર્દીમાં અગાઉ લોહીનું ટ્રાન્સફ્યુશન ના થયું હોવાથી કુદરતી રીતે જ તેમનું લોહી આ પ્રકારનું છે. તેમના સગાસંબંધીઓમાંથી માત્ર તેમના ભાઈનું લોહી તેમના જેવું છે પરંતુ સમાન બ્લડ ટાઈપ તો નથી જ. ઈમર્જન્સીમાં તેમના ભાઈ લોહી આપી શક્યા હોત પરંતુ દર્દીને બીજા હેલ્થ કોમ્પ્લિકેશન થઈ ગયા.”, તેમ ડૉ. શાહે ઉમેર્યું. રિસર્ચ પેપરમાં લખવામાં આવ્યું છે કે, ‘EMMને નવી બ્લડ ગ્રુપ સિસ્ટમ તરીકે ઓળખ આપવામાં આ કેસ મહત્વનો સાબિત થયો.’

administrator
R For You Admin