ગુજરાત દક્ષિણ ગુજરાત

એરપોર્ટ પર જ ઝઘડીને અલગ થયેલાં નવસારીનાં NRI પતિ-પત્ની ફરી એક થયાં

લગ્ન પછી દુબઈ સ્થાયી થયેલા એક કપલ વચ્ચે મતભેદો વધી જવાને કારણે તેઓ ભારત પાછા ફર્યા હતા. રસ્તામાં જ તેમની એટલી લડાઈ થઈ કે તેઓ મુંબઈ એરપોર્ટ પરથી અલગ થઈ ગયા હતા. મુંબઈ એરપોર્ટ પરથી પતિ નવસારી અને પત્ની સુરત જવા નીકળી ગઈ હતી. પરંતુ જિલ્લા ન્યાયાલયની મધ્યસ્થતાને કારણે તેઓ ફરી એક થઈ ગયા છે.

સુરત ડિસ્ટ્રિક્ટ કોર્ટના મીડીએશન સેન્ટરમાં પતિ-પત્નીના છૂટાછેડાનો એક રસપ્રદ કેસ સામે આવ્યો છે. દુબઈમાં પાછલા ઘણાં સમયથી સ્થાયી થયેલ એક દંપતીના છૂટાછેડા કોર્ટની દખલગીરીને કારણે અટકી શક્યા છે. આ દંપત્તી વચ્ચે ઘણાં મતભેદો હતા જેના કારણે તેમણે વતન આવાવનો નિર્ણય લીધો હતો. એરપોર્ટ પર પણ તેમની એટલી લડાઈ થઈ કે ઉતર્યા પછીથી તેમણે પોતાના રસ્તા અલગ કરી લીધા હતા. પરંતુ ટિકિટને કારણે વાત કોર્ટ સુધી પહોંચી અને કોર્ટે તેમનું સમાધાન કરાવ્યું.

વિગતવાર વાત કરવામાં આવે, તો આ દંપતી મૂળ વલસાડનું છે. લગ્ન પછી તેઓ દુબઈ રહેવા માટે ગયા હતા. પરંતુ લગ્નજીવનમાં સમસ્યાઓ શરુ થઈ તો તેમણે થોડા દિવસો માટે ભારત આવાવનો નિર્ણય લીધો. લગ્ન થયાના થોડા જ સમયમાં તેમની વચ્ચેના મતભેદો વધી ગયા હતા. દુબઈથી પાછા આવતી વખતે ફ્લાઈટમાં અને એરપોર્ટ પર તેમની વચ્ચે લડાઈ એટલી થઈ કે, મુંબઈ એરપોર્ટ પર ઉતરીને તેમણે અલગ અલગ દિશા પકડી હતી. મુંબઈ એરપોર્ટથી પતિ નવસારી ગણદેવી જવા નીકળ્યો હતો જ્યારે પત્ની પિયરમાં સુરત જવા નીકળી હતી.

ઉલ્લેખનીય છે કે આ દંપતી 15મી ઓગસ્ટ, 2022ના રોજની રિટર્ન ટિકિટ લઈને આવ્યા હતા. પરંતુ એરપોર્ટ પર અલગ થયા ત્યારે આ ટિકિટ અને પાસપોર્ટ પતિ પાસે રહી ગયા હતા. દુબઈ પાછા જવાના દિવસો નજીક આવી ગયા પરંતુ પતિ-પત્ની વચ્ચે સમાધાન નહોતુ થયું. આ સમસ્યાનું નિરાકરણ લાવવા માટે તેઓ કોર્ટ પહોંચ્યા હતા. સુરત ડિસ્ટ્રિક્ટ કોર્ટના મીડીએશન સેન્ટરમાં તેમણે પ્રી-લીટીગેશન અરજી કરી હતી. સમયની તાકીદને ધ્યાનમાં રાખીને કોર્ટે પતિ-પત્નીને 12મી ઓગસ્ટના રોજ સુરત મીડીએશન સેન્ટરમાં હાજર રહેવાનો આદેશ આપ્યો હતો.

12મી ઓગસ્ટના રોજ પતિ કોર્ટમાં હાજર નહોતો રહ્યો. તેણે કોર્ટ સમક્ષ દલીલ કરી હતી કે, ગણદેવીથી સુરત સુધી તે આવી નથી શકતો, પરંતુ તેણે નવસારી સુધી આવવાની તૈયારી દર્શાવી હતી. આખરે નવસારી સેન્ટર ખાતે પતિ-પત્નીને બોલાવવામાં આવ્યા હતા. અહીં મીડીએટર મુકેશ ગજ્જરે બન્નેને સમજાવ્યા હતા. અહીં દંપતીએ એકબીજા સાથે વાતચીત કરી હતી. તેઓ જૂની વાતો ભૂલીને નવું જીવન શરુ કરવા માટે તૈયાર થઈ ગયા હતા.

administrator
R For You Admin