પાકિસ્તાનની ધમકી પર અનુરાગ ઠાકુરનો સણસણતો જવાબ, PCB-રમીઝ રાજાને બતાવ્યો અરીસો

બીસીસીઆઈના સચિવ જય શાહે ગયા મહિને એક નિવેદનમાં કહ્યું હતું કે, આગામી વર્ષે પાકિસ્તાનમાં યોજાનાર એશિયા કપ માટે ટીમ ઈન્ડિયાને પાડોશી દેશ મોકલવામાં આવશે નહીં અને આવી સ્થિતિમાં એશિયા કપ તટસ્થ સ્થળે યોજવો પડશે. આ પછી પીસીબીએ બીસીસીઆઈને ધમકી આપવાનો પ્રયાસ કર્યો હતો અને કહ્યું હતું કે જો આવું થશે તો પાકિસ્તાની ટીમ પણ આવતા વર્ષે વર્લ્ડ કપ માટે ભારત નહીં આવે.

‘ભારતને અવગણી શકાય નહીં’

હવે એક દિવસ પહેલા પીસીબી ચીફ રમીઝ રાજાએ ફરી એક વાર આમ તેમ નિવેદન કર્યા હતા અને કહ્યું હતું કે જો પાકિસ્તાની ટીમ વર્લ્ડ કપ માટે ભારત નહીં જાય તો કોઈ ટૂર્નામેન્ટ પણ જોશે નહીં. BCCIના પૂર્વ અધ્યક્ષ અને રમતગમત મંત્રી અનુરાગ ઠાકુરે PCBની આ પોકળ ધમકીનો જડબાતોડ જવાબ આપ્યો છે.

સમાચાર એજન્સી એ ઠાકુરને ટાંકીને કહ્યું કે, યોગ્ય સમયની રાહ જુઓ. સ્પોર્ટ્સ જગતમાં ભારત એક મોટી તાકાત છે અને કોઈ પણ દેશ ભારતને અવગણી શકે નહીં. ઓક્ટોબરમાં જ્યારે આ વિવાદ શરૂ થયો ત્યારે પણ અનુરાગ ઠાકુરે પીસીબીની ધમકીનો આ જ રીતે જવાબ આપ્યો હતો.

રમીઝ રાજાએ શું કહ્યું?

તમને જણાવી દઈએ કે રમીઝ રાજાએ તાજેતરમાં એક પાકિસ્તાની મીડિયા સાથે વાત કરતા કહ્યું હતું કે જો ભારતીય ટીમ આવતા વર્ષે એશિયા કપ માટે પાકિસ્તાન નહીં આવે તો તે પણ વર્લ્ડ કપ માટે પોતાની ટીમને ભારત નહીં મોકલે. તેણે કહ્યું કે પાકિસ્તાની બોર્ડ આ મુદ્દે આક્રમક વલણ અપનાવશે અને પાકિસ્તાની ટીમ જે પ્રકારનું સારું પ્રદર્શન કરી રહી છે તેને જોતાં જો પાકિસ્તાન વર્લ્ડ કપમાં નહીં રમે તો કોઈ પણ ટૂર્નામેન્ટ જોશે નહીં. યોગાનુયોગ, T20 વર્લ્ડ કપની જેમ, ભારત અને પાકિસ્તાન આગામી વર્ષે યોજાનાર ODI વર્લ્ડ કપમાં એક જ ગ્રુપમાં છે.